Kamal Abdullanın "Platon, deyəsən, xəstələnib" ("Platon, kajetsya, zabolel...") adlı hekayələrindən ibarət kitabı rus dilində "Xudojestvennaya literatura" nəşriyyatında yenicə işıq üzü görüb.

Axar.az xəbər verir ki, kitabda "Parisin seçimi", "Labirint", "Balaca həyətin həngamələri" və "Səhvlərimizin qrammatikası" silsiləsindən olan hekayələr sözügedən bölmələr altında qruplaşdırılıb. Əsasən, Bakıda dərc olunan "Sirri-Zəmanə" kitabının estetikası üzərində tərtib olunan kitabda Azərbaycan oxucusuna yaxşı tanış olan hekayələr rus ictimaiyyətinə təqdim edilib.

Kitabın ön sözünü isə Qoqol, Bunin və Aytmatov mükafatlarının laureatı, məşhur "Litqazeta"nın Baş redaktoru, yazıçı-dramaturq Yuri Polyakov yazıb. Yuri Polyakov Kamal Abdullanın yaradıcılığını uzun illərdir izlədiyini bildirib. "Kamal Abdulla intellektual nəsr janrında yazan ən maraqlı yazıçılardan biridir; onun əsərləri Platondan Borxesə kimi dərin zənginliyə malikdir. O aktuallaşdırır, dəyişdirir, ona qədər deyilənləri yenidən şərh edir və yeni bir fikir yaradır. Axı yenilik köhnə anlayışdır", - deyə Polyakov ön sözdə qeyd edir.