"Rusiya və Qərb arasında guya Dağlıq Qarabağ münaqişəsi fonunda gedən çəkişmə məsələnin həllində heç bir rol oynamayacaq".

Bunu Axar.az-a açıqlamasında Təhlükəsiz Enerji Tədqiqat Mərkəzinin rəhbəri, politoloq Ceyhun Mahmudlu Qarabağ münaqişəsinin superdövlətlərin müzakirəsində olmasına və həlli imkanlarına münasibət bildirərkən deyib. O bildirib ki, bütün bunlar Ukrayna münaqişəsi ilə əlaqədar yaranan problemlərdən irəli gəlir:

"Son zamanlar "Rusiya Ermənistanın yanındadırsa, onda Qərb də Azərbaycanın yanındadır" kimi tendensiyalar reallığı əks etdirmir. Çünki bunlar hamısı müstəqil inkişaf edən hadisələrdir. Həmsədr ölkələr daha çox Ermənistanı dəstəkləyirlər. Əlaqələrin daha da sıx olması bunu göstərir. Rusiya və həmsədr ölkələrin Qarabağ münaqişəsinin bundan sonrakı həllində necə işləyəcəkləri problematik görünməsə də, hansısa irəliləyişlərin olması inandırıcı deyil. Çünki sözügedən ölkələr arasında münasibətlər qarşıda daha da korlanarsa, nəinki məlum məsələ, bir çox məsələlər də sual altında qalacaq".