"Daxili İşlər naziri Ramil Usubov azyaşlılar tərəfindən törədilmiş cinayətlərin səbəb və şəraitinin müəyyən edilməsi, nəzarətsiz qalmış, hüquq pozmalara meyilli və təhsildən yayınan uşaqların zamanında aşkar edilib qeydiyyata alınması, zəruri qabaqlayıcı-profilaktik tədbirlərlə əhatə olunması, onların yenidən tərbiyəsi və hüquqlarının müdafiəsi yönündə lazımi tədbirlər görülməsinin, habelə orta, orta-ixtisas və ali məktəblərdə narkotik vasitələrdən istifadənin zərərli nəticələri mövzusunda davamlı görüşlərin vacibliyini bildirib".

Axar.az xəbər verir ki, bu sözləri millət vəkili Fazil Mustafa nazir Ramil Usubovun ötən gün keçirdiyi kollegiya iclasının nəticələri barədə danışarkən deyib. Millət vəkilinin sözlərinə görə, müzakirə çox aktual məsələyə həsr olunmuşdu:

"Dünən keçirilən Daxili İşlər Nazirliyinin kollegiyasında son dərəcə aktual bir məsələyə diqqət yetirilib. Əlbəttə, bu məsələlərə xüsusi diqqət ayrılması təqdir olunmalıdır. Burada əsas məsələ cəmiyyətin bu prosesə daha effektli dəstək verməsi mexanizminin tapılmasıdır. Gizlətməli deyil, orta məktəblərdə narkomaniya sürətlə yayılmaqdadır, təhsildən yayınaraq qeyri-hüquqi fəaliyyətlərə cəlb edilən kifayət qədər yeniyetmələr var, ona görə də bu işi təkcə bir Daxili İşlər Nazirliyinin və Təhsil Nazirliyinin üzərinə qoymaq olmaz, mütləq stimullaşdırıcı addımlar atmaq vacibdir ki, ayrı-ayrı vətəndaşlar bu halların qarşısının alınmasına cəlb olunsunlar, problemdən xəbəri olan məktəblilərin yaxınları hüquq-mühafizə orqanları ilə təmasdan çəkinməsinlər".

Millət vəkilinin sözlərinə görə, Daxili İşlər Nazirliyində Milli Məclisin Hüquq siyasəti və Dövlət Quruculuğu, Elm və Təhsil, İnsan Hüquqları komitələrinin üzvləri ilə məlumatlandırma və fikir mübadiləsi xarakterli görüş təşkil etmək, təhsillə, insan hüquqları ilə bağlı ixtisaslaşmış QHT-lərin də keçirilən profilaktik tədbirlərdə iştirakını təmin etmək lazımdır:

"Səhiyyə Nazirliyi hər üç aydan bir məktəblərdə oğlanların narkotik aludəçiliyi ehtimalını aşkara çıxaran profilaktik yoxlamalar həyata keçirə bilər. Qanunvericilikdə də bu istiqamətdə məsuliyyəti gücləndirən əlavə və dəyişikliklər edilməsi mümkündür. Bu məsələyə ona görə həssas yanaşılmalıdır ki, sonradan narkotik aludəsi olanların böyük əksəriyyəti bu vərdişi yetkinlik yaşlarından çevrənin təsiri ilə qazanırlar".