Oktyabrın 11-də Amerika Birləşmiş Ştatlarının Kaliforniya ştatının San Dieqo şəhərində dahi Azərbaycan bəstəkarı Qara Qarayevin "Yeddi Gözəl" baletinin Amerika premyerası gerçəkləşib.

Bu barədə Axar.az-a Mədəniyyət və Turizm Nazirliyinin mətbuat xidmətindən məlumat verilib.

San Dieqonun Civic Teatrında baş tutan premyeraya Azərbaycandan da nümayəndə heyəti qatılıb. Heyətin tərkibinə ARDNŞ-in vitse-prezidenti Xaliq Məmmədov, Milli Məclisin deputatı, Azərbaycan Dillər Universitetinin rektoru professor Səməd Seyidov, Milli Məclisin deputatı Asim Mollazadə, Azərbaycan Bəstəkarlar İttifaqının sədri Firəngiz Əlizadə, Mədəniyyət va Turizm Nazirliynin nümayəndəsi Azadə Huseynova, dirijor Eyyub Quliyev, xalg artisti, xoreograf Mədinə Əliyeva daxil edilib.

Baletin libbrettosu, xoreografiya va səhnələşdirilməsini Civic Teatrinin bədii rəhbəri Xavyer Velasko həyata keçirib. Tanınmış dirijor Randall Tviidin rəhbərliyi altında Grossmont Simfonik Orkestri tərəfindən ifa olunan Q.Qarayev musiqisi bu teatrın səhnəsində möhtəşəm səslənib. Randall Tviidin tamaşadan öncə verdiyi açıqlamada Qara Qarayevin musiqisinin ecazkarlıgından danışıb, dinlədiyi ilk dəqiqələrdən ona valeh olduğunu və mütləq geniş tamaşaçı kütləsi qarşısında Qarayev yaradıcılığını ifa etmək arzusunda oldugunu söyləyib.