Ana səhifə Gündəm |
"Azərbaycanda yerli idarəetmə orqanları bələdiyyələrin möhkəmlədilməsində xüsusi diqqət ayırırlar"
Bu gün Avropa Şurasının Yerli və Regional Hakimiyyətləri
Konqresinin (AŞNK) dəvəti ilə Strasburqda səfərdə olan Azərbaycanın
ədliyyə naziri Fikrət Məmmədov Azərbaycanın Avropa Şurası Nazirlər
Komitəsindəki sədrliyi adından Konqresin 27-ci sessiyasının plenar
iclasında çıxış edib.
APA-nın Avropa bürosunun xəbərinə görə, F. Məmmədov öz çıxışında
Azərbaycanın AŞNK-dəki sədrliyinin artıq sona yaxınlaşdığını və
Azərbaycanın bu ötən beş ay ərzində intensiv fəaliyyət göstərdiyini
bildirib.
Nazir AŞNK-nin son beş ay ərzində gördüyü əsas işləri haqda məlumat
verərək, NK-nin Ukrayna böhranının prioritet məsələ olduğunu və bu
məsələ ətrafında bir neçə müzakirələrin keçirildiyini söyləyib.
Bundan başqa, nazir Azərbaycanda yerli və regionlar demokratiyanın
vəziyyəti ilə bağlı konqres iştirakçılarına ətraflı məlumat
verib.
Fikrət Məmmədov ölkənin qurumdakı prioritetləri haqda danışarkən,
Azərbaycanda gənclərə, onların keyfiyyətli təhsil ala bilmələrinə
və onların gələcəkdə demokratiyanın quruculuğunda və inkişaf
etdirməsində oynadığı rola önəm verdiyini bildirib. Nazir
Azərbaycanın qonşuluq siyasətinə də üstünlük verdiyini qeyd edərək,
gələn ayın 7-8-i tarixlərində Bakıda qonşuluq siyasəti ilə bağlı
yüksək səviyyədə tədbirin keçiriləcəyini deyib və Konqresin də bu
tədbirə dəstək verəcəyinə ümid etdiyini söyləyib. F. Məmmədov
Azərbaycanda multikulturalizmin həyat tərzinə çevrildiyini, bununla
bağlı sentyabr ayında Azərbaycanda dinlərarası və
mədəniyyətlərarası dialoqa həsr edilmiş konfransın keçirildiyini,
Konqresin də bu tədbirdə yaxından iştirak etməsini alqışladığını
bildirib. F. Məmmədov öz çıxışında korrupsiya ilə mübarizə
məsələsinə də toxunaraq, bunun həm Avropa Şurası, həm də Azərbaycan
üçün çox vacib bir məsələ olduğunu vurğulayıb: "Korrupsiya
demokratiya və hüququn aliliyi kimi prinsiplər üçün təhlükədir və
buna görə də korrupsiya ilə mübarizə AŞ-nın prioritetinə çevrilib.
Korrupsiya ilə mübarizə eyni zamanda Azərbaycan hökuməti üçün də
prioritet təşkil edən məsələdir və ölkəmizdə bu istiqamətdə
əhəmiyyətli irəliləyiş əldə olunub. Bu yay biz Bakıda korrupsiya
ilə mübarizə mövzusunda yüksək səviyyədə tədbir keçirdik. Bundan
başqa, BMT-nin təşəbbüsü ilə təsis olunan Korrupsiyaya qarşı
Beynəlxalq Assambleyanın 3-cü sessiyasının toplantısı bu ilin
noyabr ayında Bakıda təşkil olunacaq. Korupsiya ilə mübarizə
sahəsində bilik və təcrübə baxımından bu ortada olan boşluqları
doldurmaq üçün yaxşı fürsətdir və biz də bununla bu əhəmiyyətli
məsələyə öz töhfəmizi verə biləcəyik. Biz bilirik ki, Konqres də bu
məsələ ilə bağlı ciddi fəaliyyət göstərir. Bu məsələlər bizim
sədrliyimizin prioritetləridir, amma biz bu işləri sədrliyimizdən
sonra da ciddi şəkildə davam etdirəcəyik".
Daha sonra F. Məmmədov Azərbaycanda yerli və regional
demokratiyanın inkişafı, bələdiyyə orqanlarının fəaliyyəti haqda
geniş məlumat verib: "Azərbaycanda yerli idarəetmə orqanları
bələdiyyələrin möhkəmlədilməsində xüsusi diqqət ayırırlar. Bu
sahədəki qanunlar getdikcə təkmilləşdirilir. Yerli özünüidarəetmə
və bələdiyyələr sahəsində yüzlərlə qanunvericilik aktları qəbul
olunub".
Nazir deyib ki, prezidenti İham Əliyev insan hüquqları, şəffaf
idarəetmə və korrupsiya ilə mübarizə üzrə milli fəaliyyət planını
təsdiq edib və bütün bunlar da yerli özünüidarəetmənin inkişaf
etdirilməsində müsbət rol oynayır: " 2020-ci ilədək Azərbaycanın
inkişafı konsepsiyası qəbul olunub və burada bizim ölkənin
inkişafının strategiyaları və məqsədləri müəyyən olunub. Digər
məsələlərlə yanaşı, burada bələdiyyə orqanlarının potesialının
möhkəmləndirilməsi və bələdiyyə idarəçiliyi sahəsində insan
resurslarının istifadəsi kimi məsələlər də öz əksini tapıb".
Sonda Dağlıq Qarabağ münaqişəsinə toxunan nazir, Azərbaycan
ərazilərinin Ermənistan tərəfindən işğal edilməsi faktını konqres
üzvlərinin diqqətinə çatdırəb: "Əlbəttə ki, bələdiyyələrin
təkmilləşdirilməsi istiqamətindəki tədbirlərimiz davam etdiriləcək.
Azərbaycanda bu proses daimi xarakter daşıyır və sizi əmin etmək
istərdim ki, bizim bu sahədə apardığımız islahatlar, birgə
fəaliyyətimiz bundan sonra da davam etdiriləcək. Lakin təəssüflər
olsun ki, Ermənistanla Azərbaycan arasındakı Dağlıq Qarabağ
münaqişəsi nəticəsində Azərbaycanın 20% ərazilərinin işğal edilməsi
bu ərazilərdə yerli özünüidarəetmə orqanlarının təşkil edilməsinə
imkan vermir. Qaçqın və məcburi köçkün vəziyyətinə düşmüş bir
milyon azərbaycanlı yerli özünüidarəetmədən məhrum olublar".
Tarix
2014.10.15 / 22:11
|
Müəllif
Axar.az
|