"Saakaşvilinin hakimiyyəti dövründə heç vaxt minarələr, məscidlər dağıdılmayıb, imanlı insanlara qadağalar qoyulmayıb, mədrəsələrin qarşısına donuz başı asılmayıb".

Axar.az xəbər verir ki, bu açıqlama ilə eks-prezident Mixail Saakaşvilinin Gürcüstan Vahid Milli Hərəkat Partiyasının üzvü, keçmiş deputat Ramin Bayramov çıxış edib.

O, Saakaşvili dövründə həll olunmamış məsələlərin qaldığını bildirib:

"Bəzi radikal qruplar var idi ki, onlar Bolnisi rayonu Faxralı kəndində məscidin restavrasiyası ilə bağlı provokasiyalar həyata keçirirdilər. Amma orada da dövlət nəzarəti öz əlinə aldı. Dövlət öz vədinə əməl etdi. Saakaşvili dövründə az məscid tikilməyib, amma onların sayı min də olmayıb. O zamankı müxalifətin nümayəndələri və bəzi dini liderlər hay-həşir salaraq, xristian elektoratı prezidentə qarşı qoymağa çalışırdılar. Əlbəttə, bəzi problemlər həll edilməz qaldı. Məsələn, Bolnisi kəndlərindəki toponimlərlə bağlı məsələ mən və mənim həmkarlarım tərəfindən qaldırılsa da, heç kim bununla bağlı məsuliyyəti üzərinə götürmədi. Belə ki, burada bir tərəfi razı salanda digər hissə elektoratı itirmiş olurdun. Amma problem təkcə bunda deyildi. Bu rayonda stabil vəziyyətdə münaqişə ocağı yaratmaq üçün şərait var idi ki, ondan da üçüncü qüvvələr istifadə edə bilərdilər. Ona görə atılacaq addımlar çox riskli idi və heç kim məhz buna görə məsuliyyəti üzərinə götürmürdü. Məhz bu məsələdən istifadə edən "Gürcüstan Arzusu"nun nümayəndələri olan etnik azərbaycanlılar o zaman müxalifətdə dayanaraq, bizim bütün günahlara məsuliyyət daşıdığımızı bildirirdilər. Halbuki indi həmin insanlar mühüm vəzifələrdə özlərinə yer ediblər. Bu gün onlar belə məsələlərdən danışmağa qorxurlar və dəvəquşu kimi başlarını qumun içinə soxublar".