Üç böyük qüvvə arasında baş tutan bu görüş Suriya böhranının həlli istiqamətində atılan olduqca ciddi addım kimi qiymətləndirilməlidir.

Bu sözləri Axar.az-a Vaşinqton Qulf Analitik Mərkəzinin baş məsləhətçisi doktor Teodor Karasik Rusiya, ABŞ və İsrail təhlükəsizlik müşavirlərinin Qüds görüşünü şərh edərkən deyib.

“Bütün bunların mərkəzində İran durur və onun gələcəkdə atacağı hər bir addım bu üç qüvvə üçün böyük əhəmiyyət kəsb edir. İranın koordinasiyası, ən azından müzakirəsi Rusiya, ABŞ və İsrailin gündəmindədir. Tərəflərin heç olmasa birinin geriyə addım atması mütləqdir. Əks halda heç bir razılıq əldə olunmayacaq. Skeptiklər yenə bu görüşə baxıb güləcək və köhnə mövzuların müzakirəsi davam etdiriləcək”.

Xatırladaq ki, ötən gün Rusiya Təhlükəsizlik Şurasının katibi Nikolay Patruşev, ABŞ Prezidentinin milli təhlükəsizlik üzrə köməkçisi Con Bolton və İsrail Milli Təhlükəsizlik Şurasının rəhbəri Meir Ben-Şabbat Qüdsdə Suriya ilə bağlı üçtərəfli danışıqlar aparıb.