Məhbus Lamiyə Quliyevanın azadlığa çıxmasına aparan proseslə bağlı yeni xəbərlər yayılır. Bu məlumatlar sırasında Quliyevaya açılan ikinci cinayət işinin bəzi detalları məlum olub.

APA yazır ki, Lamiyə olduğu 4 saylı cəzaçəkmə müəssisəsinin tualetində siqaret çəkib. Bu zaman Aysel adlı nəzarətçi ona siqaret çəkməyin qadağan olduğunu deyib. Lakin Lamiyə onu təhqir edib və nəzarətçi xidməti otağa gedib. Lamiyə isə arxasınca otağa daxil olub, sobanın üzərində olan isti çaydanı götürərək nəzarətçiyə atıb.

Həmin çaydanın ona dəymədiyini gördükdə isə ikinci çaydanı götürərək ona tərəf atıb. Nəzarətçi xəsarət alıb, tibbi ekspertiza təyin olunub. Ekspert nəzarətçinin bədənində xəsarət olması barədə rəy verib.

Quliyeva barəsində Cinayət Məcəlləsinin 317.2-ci (cəzaçəkmə müəssisəsinin normal fəaliyyətini pozma) maddəsi ilə növbəti cinayət işi başlanıb. Xətai Rayon Məhkəməsində hakim Habil Məmmədovun sədrliyi ilə 2010-cu il avqustun 6-da 6 il müddətinə azadlıqdan məhrum etmə hökmü çıxarılıb.

Ancaq proseslərin gedişatı belə deməyə əsas verir ki, Lamiyə cəzasını başa vurmadan azadlığa çıxa bilər. Vəkili Fəxrəddin Mehdiyev də "Modern.az"a deyib ki, verilən apelyasiya şikayətindən sonra mütləq şəkildə hökm dəyişdiriləcək və cəza yüngülləşəcək:

"Amma bu qərar məhkəmədən asılıdır. Çox güman ki, növbəti həftənin əvvəlində məhkəmənin günü, işin hansı hakimin icraatında olacağı bilinəcək. Lamiyə Quliyeva ilə görüşdüm. O özünün və övladının qaldığı şəraitdən razıdır, hər ikisinin səhhəti normaldır".

1987-ci il təvəllüdlü Lamiyə Quliyeva 2003-cü ildə həbs edilib. Cinayət Məcəlləsinin 120-ci (qəsdən adam öldürmə) maddəsinə əsasən, L.Quliyeva və keçmiş nişanlısı Vüqar Əliyev 2003-cü ilin mayında Şəmkir rayonun sabiq icra başçısı Aslan Aslanovun oğlu Ruslanı qətlə yetirməkdə təqsirləndiriliblər.