Azərbaycan Respublikası Dövlət Neft Şirkətinin (ARDNŞ) Təhlükəsizlik idarəsinin rəisi general Rəşad Əliyev qeyri-müəyyən səbəblərdən ölkəni tərk edib.

Bu haqda "Axar.az"a etibarlı mənbədən daxil olan məlumatda bildirilir.

Məsələni araşdırmaq üçün ARDNŞ-nin mətbuat xidməti ilə əlaqə saxladıq. Özünü ARDNŞ-nin mətbuat xidmətinin əməkdaşı kimi təqdim edən Valentina Pavlovna bu xəbərin yanlış olduğunu bildirdi, Rəşad bəyin əlaqə telefonunu istədikdə isə özünün təqaüdçü olduğunu və bundan artıq heç nə deyə bilməyəcəyini bildirdi.

Daha sonra ARDNŞ-ın Təhlükəsizlik İdarəsinin rəisi Rəşad Əliyevin xidməti nömrəsinə zəng vurduq. Telefona cavab verən və özünü İdarə rəisinin köməkçisi Ziya olaraq təqdim edən şəxs bildirdi ki, rəis hal-hazırda toplantıdadır.

Xatırladaq ki, mətbuatda yayılan bilgilərə görə, ARDNŞ-nin Təhlükəsizlik İdarəsinin rəisi general Rəşad Əliyev Rövnəq Abdullayevin yaxın qohumu, tanınmış jurnalist Rüstəm Əliyevin qardaşıdır; xalası Sədaqət Vəliyeva isə Milli Məclisin sosial siyasət komitəsinin üzvüdür.

Məlumatı dəqiqləşdirmək üçün səylərimizi davam etdiririk.