105 saylı Tovuz seçki dairəsindən deputatlığa namizəd Qənirə Paşayeva rayon ərazisində görüşlərini davam etdirib.

Axar.az xəbər verir ki, Q.Paşayeva Tovuzun böyük kəndlərindən biri olan Abulbəyli kəndini gəzib, seçiciləri ilə görüşüb.

Q.Paşayeva ötən 14 illik deputat fəaliyyəti barədə danışaraq, bu illər ərzində seçicilərinin ona olan etimadını doğrultmaq üçün çalışdığını deyib. Qənirə Paşayeva bildirib ki, tovuzlular yenidən ona etimad göstərərlərsə, gələcəkdə də onları və bütövlükdə ölkəmizi daim layiqincə və ləyaqətlə təmsil etmək üçün əlindən gələni etməyə çalışacaq, seçicilərin bundan sonra da hər zaman səsi olacaq.

Paşayeva xalqa xidmət göstərməkdən gözəl bir şey olmadığını, bu günə qədər olduğu kimi, bundan sonra da hər zaman məhz bu düşüncə ilə seçicilərinə diqqət göstərəcəyini deyib:

“Tovuz mənim dünyaya göz açdığım yerdir, mənim üçün çox əzizdir. Mən hər zaman Tovuzun və əziz seçicilərimin qarşılaşdığı problemi, üzləşdiyi çətinliyi öz şəxsi məsələmdən ayırmamışam. Mən şəxsi deyil, hər zaman seçicilərim üçün xahiş etmişəm. Siz mənə 14 il əvvəl ailənizin bir üzvü kimi sahibləndiniz və mən də sizə söz verdim ki, bu səmimiyyət və etimadınıza hər zaman layiq olmaq üçün çalışacam. Bütün fəaliyyətim boyunca bu sözü heç unutmadım”.

Hər bir seçicinin 9 fevral seçkilərində fəal olmasının və seçkilərdə iştirakının vacibliyini vurğulayan Q.Paşayeva seçkilərin azad və şəffaf keçiriləcəyinə əminliyini bildirib.

Seçicilər Qənirə Paşayevanın deputat kimi fəaliyyətindən razılıqlarını ifadə ediblər və ona dəstəklərini davam etdirəcəklərini bildiriblər.

Millət vəkili kənd sakinləri ilə görüşdən sonra bir sıra vətəndaşları tək-tək də dinləyərək, onları narahat edən problemlərlə də bağlı qeydlər aparıb.

Qənirə Paşayeva, həmçinin, Abulbəylidə fiziki imkanları məhdud insanlarla da görüşüb, onların qayğıları ilə maraqlanıb və hər zaman onların yanında olacağını deyib.