Şəmkirin sabiq icra başçısı Aslan Aslanov Vəkillər Kollegiyasına şikayət məktubu yazıb. A.Aslanov ömürlük həbsdə olan Vüqar Əliyevin vəkili Adəm Məmmədovun cəzalandırılmasını tələb edir.

"Musavat.com" xəbər verir ki, Aslanov vəkilin onun şərəf və ləyaqətini alçaldan hərəkətlər etdiyini bildirib.

Vəkilin sözlərinə görə, A.Aslanov məktubun altına imza atmazdan əvvəl ona hədə-qorxu gəlib: "Müvəkkili olduğum şəxsi müdafiə edərkən lazım olan faktların, yeni halların araşdırılması istiqamətində bir hüquqşünas kimi axtarışlar aparmağım vəzifə borcumdur. Mənə qarşı təhdid və hədə-qorxularınız nəticə verməyəcək. Hüquqlarını müdafiə etdiyim şəxsin müdafiəsi istiqamətində əldə etdiyim və eyni zamanda cəmiyyətimizə məlum olan faktlar qarşı tərəfin maraqlarına zidd ola bilər".

Vəkil deyib ki, Aslanovdan əvvəl də barəsində şikayət edənlər olub: "Bir qisim şəxslər var ki, çəkişdikləri tərəfin vəkilinin olmasını belə qəbul etmirlər. Vüqar Əliyevin müdafiəsi tərəfimdən sırf qanuni yolla və faktlarla həyata keçirilir".