Dövlət Miqrasiya Xidmətinin (DMX) rəisi Vüsal Hüseynovun iştirakı ilə DMX yanında İctimai Şuranın növbəti iclası keçirilib.

Bu barədə Axar.az-a DMX-nin ictimaiyyətlə əlaqələr idarəsindən məlumat verilib.

Görüşdə Xidmət rəisi pandemiya dövründə Prezident İlham Əliyevin rəhbərliyi ilə atılan vacib addımları xüsusi vurğulayıb. Vüsal Hüseynov bildirib ki, koronavirusla mübarizədə dövlətimizin başçısının qətiyyətli qərarları, görülən qabaqlayıcı tədbirlər, müsbət nəticələrin əldə olunmasının əsas səbəbləridir. Ümumdünya Səhiyyə Təşkilatı (ÜST) və digər beynəlxalq qurumlar tərəfindən Azərbaycanda görülmüş işlərə yüksək qiymət verildiyini xatırladan Xidmət rəisi pandemiyaya qarşı həyata keçirilən tədbirlərə görə nümunəvi ölkə kimi dəyərləndirildiyimizi diqqətə çatdırıb.

Vüsal Hüseynov mövcud durumla əlaqədar DMX tərəfindən görülən işlər, həmçinin göstərilən xidmətlərin təkmilləşdirilməsi istiqamətində tətbiq olunan yeniliklər və cari vəziyyət barədə geniş məlumat verib. Qeyd edib ki, səmərəliliyin artırılması məqsədilə müasir texniki innovasiyaların tətbiqi daha da genişləndirilərək bütün sənədləşdirmə işləri elektronlaşdırılıb.

DMX yanında İctimai Şuranın sədri Azər Allahverənov cari ilin birinci rübündə İctimai Şura üzvləri tərəfindən görülmüş işlər və yeniliklərin tətbiqi barədə məlumatları təqdim edib.

Görüşdə koronavirus şəraitində əcnəbi və vətəndaşlığı olmayan şəxslərin olduğu yer üzrə qeydiyyatı (o cümlədən müddətin uzadılması üçün ödənişlərin tətbiqi), elektron resurslardan istifadə və digər aktual məsələlər ətrafında fikir mübadiləsi aparılıb.

Sonda İctimai Şura üzvlərinin təklifləri müzakirə edilib.