Avropa Şurası Parlament Assambleyasının (AŞPA) yay sessiyasının bu gün keçirilən plenar iclasında deputatlar qurumun baş katibi Tyorbörn Yaqlanda suallar ünvanlayıblar.

Trend-in məlumatına görə, Azərbaycan nümayəndə heyətinin üzvü Rafael Hüseynov T. Yaqlandan bir milyona yaxın azərbaycanlı qaçqın və məcburi köçkünlərin pozulmuş hüquqları və AŞ-nın onların fundamental hüquqlarının bərpası istiqamətində işlərin görülməməsinin səbəblərini soruşub.

T. Yaqland isə Dağlıq Qarabağ məsələsinə toxunaraq bu problemin həlli ilə bağlı ATƏT-in Minsk qrupunun məşğul olduğunu xatırladıb. "Siz hamınız bu məsələlərin nə qədər mürəkkəb və həssas olduğunu çox yaxşı bilirsiniz. Azərbaycandakı münaqişə ilə bağlı vəziyyət ATƏT-in Minsk qrupundan asılıdır. Bizim bu məsələdə mandatımız yoxdur, danışıqlarda da iştirak etmirik. Sizin qaldırdığınız məsələləri yaxından və mütəmadi izləyirəm. Düzdür, indiyə kimi ortalıqda elə bir nəticə yoxdur. Bu da vəziyyətin mürəkkəbliyi ilə izah olunur və bunu da siz məndən də yaxşı bilirsiniz".