Azərbaycan Respublikasının Prezidenti İlham Əliyevin tapşırığına uyğun olaraq, qardaş Türkiyəyə göndərilmiş Fövqəladə Hallar Nazirliyinin (FHN) yanğınsöndürmə qüvvələrinin koordinasiyalı idarəetməsinin təşkili məqsədilə hazırda qardaş ölkədə olan nazir müavini general-leytenant Etibar Mirzəyev Türkiyənin kənd təsərrüfatı və meşəçilik naziri Bəkir Pakdəmirli ilə görüşüb.

FHN-in mətbuat xidmətindən Axar.az-a bildiriblər ki, görüşdə E.Mirzəyev Türkiyədə baş verən meşə yanğınları ilə mübarizə aparmaq üçün Azərbaycan Respublikasının Prezidenti İlham Əliyevin tapşırığı ilə FHN-in yanğın, xilasetmə, aviasiya və tibb qüvvələrinin qardaş ölkəyə gəldiyini qeyd edib. Türkiyəyə gəlməsində məqsədinin yardıma gəlmiş FHN-in qüvvələrinin koordinasiyalı idarəetməsinin təşkili olduğunu vurğulayan E.Mirzəyev qüvvələrin tərkibi və imkanları, həmçinin yanğınsöndürmə istiqamətindəki fəaliyyətləri barədə ətraflı məlumat verib.

Türkiyəli nazir Bəkir Pakdəmirli ölkəsində baş verən meşə yanğınlarının miqyası və yanğınla mübarizə tədbirləri haqqında danışıb. B.Pakdəmirli, həmçinin meşə yanğınlarının söndürülməsində göstərilən dəstəyə və köməyə görə Azərbaycan Respublikasının Prezidenti İlham Əliyevə və qardaş Azərbaycan xalqına təşəkkür edib.