Ana səhifə Gündəm |
Prezident İlham Əliyevin əvvəlki çıxışlarında da yer alan “vaxt vermişik”, “şərtlərə əməl olunmalıdır” tezisləri ümumən ölkə rəhbərinin, Ali Baş Komandanın müharibə məntiqini, savaş prinsiplərini, dünyabaxışını və yaxud da dövlətin bu məsələlərə iradəsini ifadə edir. Birincisi, cənab Prezidentin bu mövqeyi ilk növbədə 10 noyabr razılaşmasındakı məsələyə dayanır, ikincisi, 11 yanvar və 26 noyabr görüşlərinin nəticələrinə. Vətən müharibəsinin Cənubi Qafqazda yaratdığı fərqli qüvvələr nisbəti, yeni siyasi arxitektura kontekstində Rusiyanın və Türkiyənin aparıcı yer tutması, Azərbaycan liderinin Aşqabad görüşündə bütün fon danışıqları türkiyəli həmkarı Rəcəb Tayyib Ərdoğana bildriməsi və Türkiyə liderinin dilindən də açıqlama verilməsi, ondan öncə də Zəngilanda aparılan təməlqoyma mərasimi sübut edir ki, Ermənistan həmin kommunikasiyaları və ya konkret olaraq Zəngəzur dəhlizinin açılmasının qarşısını almaq gücündə deyil.
Bu sözləri Axar.az-a açıqlamasında millət vəkili Zahid Oruc ölkə rəhbəri İlham Əliyevin Qubaya səfəri zamanı Zəngəzur dəhlizi ilə bağlı sərt xəbərdarlığını şərh edərkən deyib.
Z.Oruc qeyd edib ki, Zəngəzur dəhlizi yalnız bizim üçün əhəmiyyətli deyil, bu dəhliz Ermənistanın xilas kəmərinə, yoluna çevrilə bilər:
“İran da bu mövzuda artıq əvvəlki kompromissiz mövqeyindən sanki geri çəkilmiş kimi görünməkdədir. Buna görə də vaxtilə Bakı-Tiflis-Ceyhan Cənubi Qafqazda transmilli layihələr çərçivəsində dünya ilə kommunikasiyanın əvvəlcə boru kəmərləri, ardınca polad magistrallar vasitəsilə birləşməsi idisə, Zəngəzur dəhlizi də Bakı-Tiflis-Ceyhan qədər bir nahiyə kimi regionu arteriyalarla birləşdirəcək vasitədir. Biz Zəngəzur dəhlizinin böyük məna daşıdığını bilməliyik. Bu dəhlizi yalnız coğrafi ölçüsü 42 kilometr olan ərazi deyil, Hörmüz boğazı, yaxud da Süveyş kanalı səviyyəsində qəbul etmək olar”.
Tarix
2021.12.07 / 14:30
|
Müəllif
Zeynəb Əkbər
|