Bu gün 60 saylı Salyan-Neftçala seçki dairəsindən deputatlığa namizəd millət vəkili, Ana Vətən Partiyasının (AVP) sədri Fəzail Ağamalı Qarabağlı inzibati ərazisində seçicilərlə görüşüb.

Ana Vətən Partiyasının mətbuat xidmətindən Axar.az-a verilən məlumata görə, görüş Fəzail Ağamalının təklifi ilə iki gün öncə Ankara şəhərində baş vermiş terror aktında həlak olanların bir dəqiqəlik sükutu ilə başlayıb.

Fəzail Ağamalının səlahiyyətli nümayəndəsi görüşü açıq elan edərək, sözü seçicilərə verib.

Kənd ağsaqqallarından Cəlil Məmmədov, Yavər Orucov, Qarabağlı kənd Ağsaqqallar Şurasının sədri Hacı Musa Kazımov, müəllimə Maral Orucova, kənd ziyalısı Ramil Zeynalov ötən 5 ildə Qarabağlı və Kərimbəyli inzibati ərazilərində həyata keçirilən mühüm tədbirlərin üzərində dayandılar, kəndlərin tam qazlaşmasını, ən müasir məktəblərin istifadəyə verilməsini, çəkilməkdə olan Şirvan-Salyan magistral yolunun əhəmiyyətini önə çəkib və bütün bunlara görə ölkə Prezidenti cənab İlham Əliyevə təşəkkürlərini bildirib, seçiciləri qarşıdan gələn parlament seçkilərində Fəzail Ağamalıya səs verməyə dəvət ediblər.

Görüşdə çıxış edən şəhid anası Rahilə Şahbazova qarşılaşdığı problemləri F.Ağamalının diqqətinə çatdırıb və ondan dəstək istəyib.

Görüşün sonunda F.Ağamalı şəhid anası R.Şahbazovanın yaşadığı evə gedərək, onun vəziyyətilə yerində tanış olub. F.Ağamalı əgər seçilərsə, həmin problemlərin aradan qaldırılmasına kömək edəcəyinə söz verib.

Qeyd edək ki, növbəti görüş oktyabrın 16-da Çuxanlı kəndində keçiriləcək.