Qərbin müəyyən dairələri Azərbaycandan heyf çıxmaq üçün Gürcüstana təzyiq göstərə bilərlər.

Bu barədə Axar.az-a açıqlamasında Prezident İlham Əliyevin yaxın gələcəkdə Gürcüstana gözlənilən səfəri barədə danışarkən politoloq Qabil Hüseynli deyib. Sabiq dövlət müşaviri son zamanlar Gürcüstanın daxili bazarına, xüsusən də qaz bazarına bir-birinin ardınca müdaxilələrin artdığını deyib:

"Qazpromun sədri Aleksey Miller Tiflisdə olarkən sərfəli qiymətlərlə qaz təklifi irəli sürsə də, sonradan bu sövdələşmə axsadı. Gürcüstanda müəyyən dairələr var ki, hələ də rus qazının alınmasını istəyirlər. Ancaq bu, Gürcüstanın mərkəzində kütləvi etirazlara səbəb oldu. Başqa bir ideya isə İrandan qaz alınması ilə bağlıdır. Bu isə çox abstrakt ideyadır. Çünki Ermənistan ərazisindən bu qaz xəttinin çəkilməsi çox baha başa gələ bilər. Sovet dövründən qalma bir qaz xətti var ki, bu da Azərbaycanın ərazisindədir. İran isə bu kəmərə meyillənməyə və Azərbaycanın ərazisi ilə öz qazını Avropa bazarına çıxarmağa çalışır. Əlbəttə, ilk vaxtlar güclü qiymətlər təklif edilə bilər. Ancaq Gürcüstan tərəfinin buna marağı yoxdur. Buna görə də Qaribaşvili Bakıya xüsusi təkliflərlə gəlmişdi. Doğrudur, ortada Gürcüstana satılan Azərbaycan qazının ucuzlaşdırılması məsələsi var. Ancaq Azərbaycan hər zaman ən çətin günlərində Gürcüstanın yanında olub. Bu gün Gürcüstanın büdcəsinin formalaşmasında Bakı-Ceyhan, Bakı-Ərzurum qaz xətti tranzitindən gələn gəlirlər 30 faizdən yuxarıdır. Digər iqtisadi əlaqələr daha da inkişaf etməkdədir".

Politoloq bildirib ki, görünür, Gürcüstanın siyasi rəhbərliyi bu görüşə ehtiyac duyub:

"Vaxtilə neft xəttinin çəkilməsi zamanı ciddi müzakirələr gedirdi, mərhum Heydər Əliyev Gürcüstan xəttini seçməklə ölkəni iqtisadi böhrandan və çökməkdən xilas etdi. İndi müxtəlif rəqiblər meydana çıxa bilər. Hətta Qərbin müəyyən dairələri də Azərbaycandan heyf çıxmaq üçün Gürcüstana təzyiq göstərə bilərlər. Gürcüstanın siyasi rəhbərliyi isə bunu çox yaxşı başa düşür. Görünür, danışıqlara ehtiyac məhz bu səbəbdən yaranıb. Ancaq Azərbaycanla əlaqələri qırmaq və Bakını kiməsə dəyişmək mümkün deyil. Nə qədər cəhd etsələr də, Azərbaycan-Gürcüstan əlaqələrinin stabil inkişafına maneə törədə bilməyəcəklər".