Bu gün Azərbaycan Respublikası Milli Məclisinə 105 saylı Tovuz seçki dairəsindən namizəd Qənirə Paşayeva təbliğat-təşviqat kampaniyası çərçivəsində Tovuzun Ermənistanla ön cəbhədə yerləşən Ağdam kəndində seçiciləri ilə görüşüb.

Axar.az xəbər verir ki, görüşdə Qənirə Paşayeva kənd sakinlərinin müharibənin ən gərgin dövründə və bu gün də düşmənin bütün təxribatlarına baxmayaraq, heç bir zaman öz evlərini tərk etmədiklərini, bununla da düşmənə ən layiqli cavab verdiklərinin hər kəs tərəfindən yüksək qiymətləndirildiyini bildirib.

10 il ərzində ildə ən azı 10-12 dəfə Ağdam kəndini ziyarət etdiyini, seçicilərinin qayğı və təkliflərini dinlədiyini, onların həlli istiqamətində Milli Məclisdə çıxışlar etdiyini və hökumət üzvləri ilə müzakirələr apardığını qeyd edən millət vəkili fəaliyyətində hər zaman ön cəbhə kəndlərinin özəl yer tutduğunu vurğulayıb.