Hazırda Azərbaycanın əhəmiyyəti həm Rusiya, həm də Qərb üçün artıb.

Bu barədə Axar.az-a politoloq İlqar Vəlizadə açıqlama verib. Ekspert hesab edir ki, Qərb Azərbaycanın regionda çox mühüm rol oynadığının fərqindədir:

"Eyni zamanda, o da həqiqətdir ki, ölkə üzərindən aparılan siyasi proseslər mürəkkəbləşir. Ancaq Azərbaycanın Avrasiya İttifaqına daxil olması müşkül məsələdir. Çünki belə bir zəmin yetişməyib. Nəzərə almaq lazımdır ki, Avrasiya İttifaqına üzvlük məsələsi ilə bağlı dolaşan bütün söz-söhbətlər dolayısı ilə yaranmış mürəkkəb vəziyyətdən xəbər verir. Hər bir fövqəl oyunçu Azərbaycan üzərindən müəyyən planlar qurub, bunları həyata keçirmək arzusundadır. Ancaq Azərbaycanın öz daxili maraqlar var. Rəsmi Bakının ən vacib prioritetlərindən biri hazırda Qarabağ münaqişəsinin tənzimlənməsidir. Hazırda nə Rusiya, nə də Qərb tərəfi problemin həllinin müstəqil şəkildə tənzimlənməsinə qarşıdır. Buna görə də Azərbaycan birmənalı şəkildə qərbyönümlü və rusyönümlü proseslərə qoşula bilməz".