Oktyabr ayının 26-da Tovuz rayonunda yerləşən N saylı hərbi hissədə dəhşətli hadisə barədə "Axar.az" olaraq xəbər vermişdik. Hərbi hissənin əsgəri Cəmil Elxan oğlu Hüseynzadə tabeçiliyində olduğu zabit və 5 əsgər tərəfindən ölümcül döyüləndən və güllələnəndən sonra kanala atılıb.

Hadisə ilə bağlı xəbər yayılan dəqiqədən indiyə qədər Müdafiə Nazirliyinin mətbuat xidmətinin rəis müavini mayor Teymur Abdullayev ilə bir neçə dəfə telefonda danışdıq. Danışıqlarımızı vaxtına görə sıralayırıq:

1. 31 oktyabr axşam saat 18:30-da: Teymur Abdullayev bildirdi ki, iş vaxtı olmadığından danışa bilməyəcək: "sabah tezdən zəng edin".
2. 1 noyabr saat 09:30-da Teymur Abdullayevin cavabı: "Saat 10-da planlaşma olacaq və ondan sonra bu məsələ ilə bağlı danışaram".
3. Saat 12:00-dur, iki saatdır mayor Abdullayevlə əlaqə qurmağa çalışırıq. Mətbuat xidmətinin şəhər nömrələrindən "510-59-02" nömrəli telefonla əlaqə saxlamağımızı istəyirlər. Həmin nömrə "avtocavablayıcıya" keçirilib, avtomat rus dilində cavab verir.

Anlaşılmır ki: Ordunun əsgəri bir zabit və 5 əsgər tərəfindən döyüldüyünü və güllələndiyini bildirir, əsgərin valideynləri ictimaiyyətə haray çəkir, amma Ordu ilə bağlı bu inanılmaz olaya Müdafiə Nazirliyi açıqlama vermək istəmir.