Bu gün Bakı Beynəlxalq Multikulturalizm Mərkəzində (BBMM) 5-ci Beynəlxalq multikulturalizm yay məktəbinin uğurla başa çatmasına dair yekun mətbuat konfransı keçirilib.

Kult.az xəbər verir ki, tədbirdə BBMM Himayəçilik Şurasının sədri, Azərbaycan Dillər Universitetinin (ADU) rektoru Kamal Abdulla çıxış edib.

Kamal Abdulla bildirib ki, mərkəz Prezident İlham Əliyevin qarşısında məqsəd qoyduğu Azərbaycan multikulturalizminin dünyada tanıdılması və təbliği ilə bağlı əhəmiyyətli layihələr həyata keçirir.

Şura sədri BBMM, YUNESKO, "Erasmus+" , "ALADDİN" layihəsi və Azərbaycanın Gənc Dostları Klubunun təşkilatçılığı ilə 24-30 iyul tarixlərində keçirilən yay məktəbinin uğurla başa çatdığını bildirib.

"ALADDİN" layihəsinin icraçı direktoru Abe Radkin Azərbaycan Respublikasının Prezidenti İlham Əliyevə və Birinci vitse-prezident Mehriban Əliyevaya bu istiqamətdəki dəstəyindən dolayı təşəkkürünü bildirərək Azərbaycanın çox unikal ölkə olduğunu bildirib, multikulturalizm sahəsindəki balanslı siyasətini yüksək qiymətləndirib.

Kamal Abdulla bir sıra xarici dövlətlərdə fəaliyyət göstərən universitetlərdə təhsil alan 60-dan artıq tələbənin iştirakı ilə 5-ci Beynəlxalq Multikulturalizm Məktəbinin Bakı şəhəri ilə yanaşı Şəki, İsmayıllı, Qəbələ və Qax rayonlarını əhatə etdiyini qeyd edib.

Kamal Abdulla və Abe Radkin sonda jurnalistlərin suallarını cavablandırıb.