Alek Bolduinə həqiqi güllələrlə dolu tapança verən “Rust” filminin rejissor köməkçisi Deyv Holls 2019-cu ildə “Azadlıq yolu” (Freedom's Path) filminin çəkilişindən qovulubmuş.

Kult.az xəbər verir ki, bu barədə “Rocket Soul Studios” məlumat yayıb.

Məlumata görə, “Azadlıq yolu” filminin çəkiliş qrupunda rejissor köməkçisi vəzifəsində Deyv Holls olub. Çəkilişlər zamanı çəkiliş qrupunun üzvü rekvizit tapançadan yaralanıb. Yaralı işçi əvvəlcə çəkiliş meydançasında olan həkimlər tərəfindən müayinə olunub, daha sonra xəstəxanaya yerləşdirilib. Hadisədən sonra Holls işindən qovulub.

Qeyd edək ki, məşhur Hollivud aktyoru Alek Bolduin Nyu Meksikoda "Rust" filminin çəkiliş meydançasında təsadüfən operator və rejissoru güllələyib. Çəkiliş meydançasında olan aktyorlar boş patronlardan atəş açmalı idilər, lakin patronlar real olub. Hadisə nəticəsində 42 yaşlı operator Qalina Hatçins ölüb.