Vəli Qasımovun vəziyyəti stabildir, müalicəsi davam edir.

Axar.az xəbər verir ki, bu sözləri "Neftçi" klubunun baş həkimi Şaiq Zöhrablı Report-a bildirib.

Onun sözlərinə görə, komandanın baş məşqçisi Vəli Qasımov Bakıdakı "HB Güvən" klinikasında müalicə alır: "Bu gün təkrar müayinə keçiriləcək və ondan sonra qərar veriləcək. Bu cür hallarda 2-3 gündən sonra xəstə evə buraxılır. Amma əlavə hansısa bir xəstəliklər aşkarlansa, o zaman müddət bir həftə də ola bilər. İndiki halda isə vəziyyət normaldır".

V.Qasımovun dünən gecə hipertonik kriz diaqnozu ilə xəstəxanaya yerləşdirildiyi bildirilir.

Xatırladaq ki, V.Qasımovun əslində xəstə olmadığı, "Neftçi" klubundakı vəzifəsindən kənarlaşdırıldığı barədə də xəbər yayılıb. Musavat.com öz mənbələrinə istinadla, ötən gecə "Neftçi"də SOCAR tərəfindən yoxlama aparıldığı və maliyyə yeyintisi olduğu barədə məlumat verib. İddiaya görə, bundan qəzəblənən rəhbərlik Ç.Abdullayevdən başqa Müşahidə Şurasının bütün üzvlərini istefaya göndərib, həmçinin V.Qasımov da işdən kənarlaşdırılıb. Bildirilir ki, baş məşqçinin işdən kənarlaşdırılmasının oyunqabağı "Neftçi"nin heyətinə və azarkeşlərinə mənfi təsir edəcəyi nəzərə alınıb və rəsmi açıqlama Qurban bayramından sonraya ertələnib.