Ana səhifə İdman |
"Palmali" Şirkətlər Qrupunun prezidenti Mübariz Mənsimov cənub klubundan qeyri-rəsmi şəkildə imtina edib. O, "Xəzər-Lənkəran"ın uğursuz çıxışlar seriyasına görə komandaya qayğısını dayandırıb.
Axar.az-a daxil olan məlumata görə, komandanın çökməsinə səbəb Mübariz Mənsimovun qardaşı, klubun prezidenti Mais Mənsimovun qeyri-peşəkar fəaliyyətidir. İddialara görə, kluba ayrılan vəsait də şəffaflıqla xərclənmir. Qeyd olunur ki, Mübariz Mənsimov qardaşının qarşısında şərt qoyub və komandanın ilk üçlüyə düşməsini tələb edib. Bu tələbə riayət edilməyəcəyi təqdirdə kluba maliyyə ayırmayacağını da vurğulayıb.
Hətta "Xəzər Lənkəran"ın futbolçuları "Qəbələ" üzərində 3:0 hesablı qələbəyə görə mükafat almayacaqlar. Klubun prezidenti öhdəlik götürüb ki, turnir cədvəlinin ilk "üçlüy"ündə qərarlaşmasa, futbolçulara mükafat verməsin.
Komanda bu qələbədən sonra 18 xalla turnir cədvəlinin 4-cü pilləsində qərarlaşıb. Bu isə Mais Mənsimova əlavə fürsət qazandırıb.
Qeyd edək ki, Mübariz Mənsimov hazırda Türkiyənin "Beşiktaş" və "Kasımpaşa" klublarında idarə heyətinin üzvüdür.
Tarix
2014.12.10 / 15:16
|
Müəllif
Emin Aslanlı
|