"Xəzər adaları" futzal klubunda maliyyə böhranı yaşanır. Klubun sahibi və sponsoru olan Hacı İbrahim Nehrəmli futzalçıların məvaciblərini vermir.

Komanda.az yazır ki, iş adamının komanda üzvlərinə 70 min manata yaxın borcu yaranıb. "Xəzər adaları"nın braziliyalı legionerləri çempionatın növbəti turunda meydana çıxmaqdan imtina edir. Braziliyalıların qaldıqları evlərin kirayə borcları da ödənmir.

"Xəzər adaları"nın məşqlərini və oyunlarını keçirdiyi "Abu Arena"nın rəhbərliyi də komandanı arenaya buraxmır. Klubun "Abu Arena"ya da borcu olduğu iddia edilir.

Futzal üzrə Azərbaycan çempionatında 4-cü dövrə start götürəcək. Dövrənin ilk oyunu isə aprelin 26-da keçiriləcək. "Xəzər adaları" çempionluq yolunda əsas rəqibi olan "Fənər"lə qarşılaşacaq.