Millimizin hər iki oyununu qənaətbəxş hesab edirəm. Unutmayın ki, Malta ilə səfərdə oynayırdıq. Mən həmişə həqiqəti demişəm. Hiss olunur ki, Robert Prosineçkinin gəlişindən sonra komandada canlanma var.

Axar.az xəbər verir ki, bu sözləri AFFA Məşqçilər Komitəsinin üzvü Böyükağa Hacıyev deyib.

Veteran mütəxəssis qol.az-a geniş müsahibəsində söyləyib ki, əvvəllər heyətdə Subaşiç, Çertaqanov və başqa legionerləri varıydı: "Bu gün isə milliləşdirilmiş legioner ancaq Dmitri Nazarovdur.

Arif Daşdəmirov, Məhəmməd Mirzəbəyov, Bədavi Hüseynov kimi oyunçular isə neçə illərdir ki, Azərbaycan futbolu üçün tər tökürlər. Azərbaycan futbolu yeddi illik fasilədən sonra öz oyununa qayıdır".

"Neftçi"nin sabiq baş məqçisi "Qarabağ" və "Qəbələ"nin avrokubok uğurlarından da danışıb: "Bunlar vaxtilə mən yazdığım tarixin davamçılarıdır. Artıq vaxt çatıb ki, qrup mərhələsindən də çıxaq.

Yeni tarix yazmaq lazımdır. Çünki bu tarixi mən yazmışam. Niyə də mümkün olmasın? Həmişə demişəm ki, məşqçi qorxaq deyilsə, heç bir rəqib keçilməz deyil. Məşqçi öz kreslosundan qorxmamalıdır".