İspaniyanın "Real Madrid" klubunun baş məşqçisi Karlo Ançelotti gələcəkdə Braziliya millisinin sükanı arxasına keçəcəyinə dair iddialara münasibət bildirib.

Axar.az Teleqraf-a istinadla xəbər verir ki, italiyalı mütəxəssis Braziliya yığmasını yüksək qiymətləndirdiyini açıqlayıb.

Lakin Ançelotti bu istiqamətdə heç bir danışıqların aparılmadığını söyləyib:

"Hazırda diqqətimi tamamilə "Real Madrid"ə yönəltmişəm. "Kral klubu" ilə qüvvədə olan müqaviləm var və kuboklar qazanmağı hədəfləmişəm. Qarşımızda vacib məqsədlər durur".

Qeyd edək ki, Braziliya Futbol Konfederasiyasının prezidenti Ednaldo Rodriges millinin baş məşqçi postuna Karlo Ançelottini əsas namizəd görür. Alternativ namizəd isə hazırda Səudiyyə Ərəbistanının "Əl-Hilal" komandasına rəhbərlik edən Jorje Jezuşdur.