Rusiyanın ən nəhəng şirkətlərindən sayılan "Başneft"in rəhbəri Vladimir Yevtuşenkov sentyabrın 16-da həbs olunması ilə bir sutka ərzində 3 miyard dollar itirib.

Axar.az Lenta.ru-ya istinadən xəbər verir ki, "Bloomberg Billionaires Index"in reytinqində ümumi sərvəti 9 milyard dollar civarında dəyərləndirilən Yevtuşenkov maliyyə fırıldağında təqsirli bilinib. "Başneft"in də daxil olduğu "Sistema" maliyyə-sənaye qrupunun əsas səhmdarı və rəhbəri olan Yevtuşenkov hazırda ev dustağıdır.

Qeyd edək ki, rusiyalı milyonçunun həbs xəbəri Moskva birjalarında "Sistema" və "Başneft"in səhmlərinə ciddi zərbə vurub və şirkətlərin qiymətli kağızlarının dəyəri 20 faiz aşağı düşüb.

Xatırladaq ki, bu olay Rusiyada klanlararası savaşın tərkib hissəsi sayılır. Hazırda kifayət qədər nüfuza malik "Rosneft"in rəhbəri İqor Seçinin "Başneft"i də ələ keçirmək niyyətinin olduğu barədə xəbərlər dolaşmaqdadır. Tərəflər bir-birinə qarşı ölümcül zərbələr vurmaq mərhələsinə keçiblər.

Vladimir Yevtuşenkovun həbsi həm də onunla diqqət çəkəndir ki, Azərbaycan torpaqlarının 20 faizinin işğalında iştirak etmiş Ermənistanın sabiq prezidenti Robert Köçəryan ev dustağı olan rusiyalı sahibkarın rəhbəri olduğu "Sistema"nın direktorlar şurasının üzvüdür. Ermənistanda artıq bu hadisələrə ciddi önəm verməyə başlayıblar.