"Rusiya rublunun durumu Azərbaycana da təsirsiz ötüşməyib".

Axar.az xəbər verir ki, bu açıqlama ilə politoloq Ərəstun Oruclu çıxış edib.

O, valyutadəyişmə məntəqələrinin əksəriyyətində məzənnəsi az qala hər saat dəyişən rus rublunu qəbul etmədiklərini deyib:

"Daxil olan məlumatlar da, öz müşahidələrimiz də göstərir ki, Rusiya rublunun durumu Azərbaycana da təsirsiz ötüşməyib. Bunun obyektiv və subyektiv səbəbləri var. Başlıca obyektiv səbəb Rusiyada çalışan azərbaycanlılar tərəfindən ailələrinə göndərilən vəsaitlərin sabit valyutada (dollar və avro) həcmi kəskin şəkildə azalıb. Həmçinin, valyutadəyişmə məntəqələrinin əksəriyyətində məzənnəsi az qala hər saat dəyişən rus rublunu qəbul etmirlər. Neftin qiymətinin düşməsinin manata da təsir edəcəyini düşünən bir çox valyutadəyişmə məntəqələrində isə ya ümumiyyətlə mübadilə aparmırlar, ya da bunu çox məhdud həcmdə həyata keçirirlər və əsasən də dollar, avro qəbul etməyə üstünlük verirlər. Bu isə daha çox psixoloji və ya başqa sözlə, subyektiv amildir. Amma hər halda, hər iki amilin müəyyən təsiri özünü büruzə verir. Manat az da olsa, ucuzlaşmağa başlayıb".

Xatırladaq ki, son ayların təhlili və büdcə qənaəti prefisit yaratdığı üçün hazırda iqtisadçılar Azərbaycan manatının mövqelərini zəiflətdiyi yox, gücləndirdiyi qənaətindədir. Buna görə də Mərkəzi Bankın manatın nəzərdə tutulandan artıq güclənməsinin qarşısını almaq üçün tədbirlər həyata keçirir. Başqa cür desək, bazara müdaxilə ilə dollar satışa çıxaran və kursu nizamlayan MB indi əks proses yerinə yetirir ki, manatın kəskin güclənməsi baş verməsin.