İstanbulda "G-20" ölkələrinin maliyyə nazirlərinin və mərkəzi bank rəhbərlərinin iki gün davam edəcək iclasına bu gün start verilib.

Axar.az xəbər verir ki, toplantıya Maliyyə naziri Samir Şərifov da dəvət olunub.

"G-20" ölkələri rəhbərlərinin noyabr ayında keçiriləcək toplantısına hazırlıq məqsədi daşıyan iclasda maliyyə nazirləri və mərkəzi bank rəhbərləri qlobal iqtisadiyyat, davamlı və balanslaşdırılmış inkişaf çərçivəsi, investisiya və infrastruktur, beynəlxalq maliyyə arxitekturası və maliyyə tənzimləmələri, habelə, beynəlxalq vergi və digər məsələlərlə bağlı müzakirələr aparacaqlar. Bundan başqa, inkişaf etmiş ölkələrdəki fərqli iqtisadi artımlar, eləcə də hazırda ABŞ iqtisadiyyatında nəzərə çarpan iqtisadi artımla müqayisədə Avropada müşahidə olunan geriləmə kimi mövzular ətrafında fikir mübadiləsi aparılacaq, gələcəkdə nəzərdə tutulan əməkdaşlıqlar müzakirə olunacaq.

Qeyd edək ki, "G-20" ölkələri rəhbərlərinin noyabr ayı üçün nəzərdə tutulan toplantısı Türkiyədə keçiriləcək. Azərbaycan "G-20"-nin ev sahibi olan Türkiyə tərəfindən dəvətli ölkə qismində bu toplantılarda iştirak edir.