Ana səhifə Kult |
Bu gün qanlı 20 Yanvar faciəsinin 27 ili tamam olur.
Kult.az şair Aləm Kəngərlinin istəyi ilə onun "20 Yanvar" adlı şeirini təqdim edir.
20 yanvar
20 yanvar-qəfil hücum,
Düşmən aldı dörd bir yanı.
Batdı yasa Azərbaycan,
Döndü selə şəhid qanı.
Dəniz, hava, yer titrədi
Mərmilərin şiddətindən.
Vicdansızlar utanmadı
Milyonların hiddətindən.
Güllələndi kişi, qadın,
Körpə, cavan, qoca-hamı.
Görüb, düşmən mat qalmışdı,
Əliyalın izdihamı.
Tanklar, toplar od ələdi,
Ürəkləri yıxdı ağrı.
Qəddar, iyrənc bir vəhşilik...
Vətənimin yandı bağrı.
Məğrurları qorxutmadı
Nə işgəncə, nə də zillət,
Əsarətə baş əymədi
Azadlığı sevən millət!
Yerə-göyə sığmasa da,
Anaların ahı, ünü,
Köləliyi diz çökdürdü
Xalqın ölüm-qalım günü!
İmperiya qanlar töküb,
Gözstərsə də, bu xofunu,
Birliyimiz məhv elədi
Müstəmləkə buxovunu!
İndi o gün bir dastandır
Hər varağı hünər dolu,
Azərbaycan tarixidir
Şəhidlərin ömür yolu!..
Tarix
2017.01.20 / 02:00
|
Müəllif
Axar.az
|