Şairlərimizin işləri necə gedir, yaradıcılıq baxımından oxucularını nə ilə sevindirə biləcəklər?

İki tanınmış şairimiz Kult.az-ın sorğusuna cavab verərək, yaradıcılıqlarındakı yenilikləri bölüşüb.

Şair-bəstəkar Xanım İsmayılqızı:

"Sözləri Qulu Ağsəsə aid olan "Yurduma dəyən olmasın" adlı yazdığım vətənpərvər mahnı XAN qrupunun ifasında səsləndi. Bundan əlavə, sözləri Elman Tovuza aid olan "Heç xəbərin olmayacaq" mahnım Şəhla Həmidovanın, sözləri Leyla Əliyevaya aid olan "Getmə" mahnım isə Ülviyyə Tağıyevanın ifasında lentə alınıb. Musiqisi və sözləri özümə məxsus olan "O yerdəyəm" mahnısı isə Ayan Babakişiyevanın ifasında lentə alınıb və hazırda həmin mahnıya klip çəkilişləri gedir. Bundan əlavə, Elçin Mirzəbəylinin sözlərinə bəstələdiyim "Ovut məni" mahnımız aranjiman prosesindədir. Yaxın günlərdə hazır olacaq. Bir necə yeni mahnı, şeir də artıq yazılıb".

Şair Ramiz Qusarçaylı:

"Hazırda "Gedəsən dünyanın axırınacan" adlı şeirlər kitabım nəşriyyatda çap prosesindədir, ümid edirəm ki, Novruz bayramına kimi dəyərli oxucularımı sevindirə biləcəyəm. Şərti adı "Məğlubiyyət" olan poemanı yekunlaşdırmaq üzrəyəm. "Seyrə seyri" adlı tarixi mövzuda bir poema yazıram. "Eşşəknamə" adlı kitabım yeni tərtibatda nəşrə hazırdır. Şeirlər, miniatür hekayələr, satirik əsərlər də yaranır".