Martın 9-dan 14-dək Mədəniyyət və Turizm Nazirliyi tərəfindən Azərbaycanda Tacikistan Kinosu Günləri keçiriləcək.

Axar.az xəbər verir ki, ölkəmizdə Tacikistan Kinosu Günləri "Azərbaycan Respublikası Hökuməti və Tacikistan Respublikası Hökuməti arasında iqtisadi əməkdaşlığa dair Proqramın həyata keçirilməsi üzrə Tədbirlər Planı"na uyğun olaraq Azərbaycan-Tacikistan qardaşlıq münasibətlərini və xalqlarımız arasında mədəni əməkdaşlıq ənənələrini möhkəmləndirmək, kino sahəsində əlaqələri genişləndirmək məqsədilə həyata keçirilir.

Bununla əlaqədar olaraq, "Tacikfilm" kinostudiyasının direktoru, kinorejissor Nosir Saidov, kino tənqidçisi, fəlsəfə elmləri doktoru Sadullo Rəhimov, Tacikistanın xalq artisti Sayram İsayeva və aktyor Abdukarim Maşrabovdan ibarət nümayəndə heyəti ölkəmizə səfər edəcək.

Kino Günləri çərçivəsində Nizami Kino Mərkəzində 5 bədii və 5 sənədli film nümayiş olunacaq.

Qeyd edək ki, Azərbaycanda Tacikistan Kinosu Günlərinin açılışı martın 10-da saat 19:00-da Nizami Kino Mərkəzində Nosib Saidovun "Müəllim" bədii filminin təqdimatı ilə baş tutacaq.