Aprel ayının 2-dən 4-dək "Bakı Ekspo Mərkəzində" 14-cü Azərbaycan Beynəlxalq Turizm və Səyahətlər (AİTF-2015) sərgisi keçiriləcək.

Axar.az xəbər verir ki, sərgi çərçivəsində Azərbaycanın turizm potensiallı bölgələrinin pavilyonları quraşdırılacaq, rayon və şəhərlər müvafiq stendlərlə təmsil olunacaq.

Bununla yanaşı, Azərbaycanın Qarabağ bölgəsinin stendi də Nazirlik tərəfindən hazırlanaraq ziyarətçilərin diqqətinə təqdim olunacaq. Qarabağ pavilyonunda Şuşa, Ağdam, Füzuli və Bərdə rayonları təmsil olunacaq.

Respublikamızın bölgələrində fəaliyyət göstərən mehmanxana və mehmanxana tipli obyektlərin, turizm şirkətlərinin, əl sənətkarlarının, milli mətbəx nümunələrinin, həmçinin folklor qruplarının, tarixi abidələrin, muzeylərin və turizm nümayişi obyektlərinin təmsil olunması nəzərdə tutulan sərginin keçirilməsində əsas məqsəd bölgələrin turizm potensialını daha geniş miqyasda təşviq etdirməkdir.

Qeyd edək ki, 2001-ci ildən başlayaraq hər il Bakıda Azərbaycan Respublikası Mədəniyyət və Turizm Nazirliyinin dəstəyi ilə "14-cü Azərbaycan Beynəlxalq Turizm və Səyahətlər" sərgisi (AITF) keçirilir.