Vitvatersand Universitetinin professorları III Riçardın skeleti üzərində aparılan araşdırmadan sonra daha bir məşhurun DNT-sini öyrənmək qərarına gəliblər.

Axar.az xəbər verir ki, bu dəfə Vitvatersand Universitetinin müəllimləri Vilyam Şekspirin skeletini araşdıracaq.

"Deyli Teleqraf"ın ("The Daily Telegraph") yaydığı məlumata görə, universitetin direktoru Frensis Tekkerey bu haqda özü açıqlama verib. Onun sözlərinə görə, Şekspirin skeletini araşdırmaqla onun necə həyat sürdüyü, nə ilə qidalandığı haqda ətraflı məlumat əldə etmək mümkün olacaq. Maraqlısı budur ki, cənab Tekkerey öz açıqlamasında Şekspirin məhz marixuana çəkib-çəkmədiyini müəyyənləşdirmək üçün onun DNT-sini araşdırmaq fikrinə düşdüyünü bildirib.

Qeyd edək ki, böyük ingilis dramaturqu Vilyam Şekspir yaratdığı nadir sənət nümunələri ilə dünya ədəbiyyatının önəmli simalarından biri hesab olunur.