Bir neçə gün öncə Nizami Kino Mərkəzində təqdimatı keçirilən "Tərk edilmiş" filminin davamı çəkiləcək.

Axar.az xəbər verir ki, rejissor Korhan Uğurun filmində yenə də baş rollarda azərbaycanlı aktyorlar Könül Nağıyeva və Kamran Ağabalayev çəkiləcək.

Bu barədə Kamran Ağabalayev açıqlama verib. Onun sözlərinə görə, filmin davamında çəkilmək təklifi Könülə filmin Bakı təqdimatı zamanı gəlib.

"Rejissor bizim oyunumuzu çox bəyənib. Biz də məmnuniyyətlə filmin davamında çəkilməyə razılaşdıq. Bu dəfə ssenari bir az fərqli olacaq. Rejissor tamaşaçılara mənim necə cinayətkar olduğumu göstərmək qərarına gəlib. Bir sözlə, mənim qəhrəmanımın hekayəsi çəkiləcək. Düzünü desəm, çəkilişlərin başlamasını səbirsizliklə gözləyirəm. Rejissor artıq yayda çəkilişlərə başlamağı planlaşdırır. Bu bizim Könüllə növbəti uğurumuzdur", - deyə Kamran bildirib.

Qeyd edək ki, birinci film Suriyadakı münaqişə nəticəsində Türkiyəyə qaçan və öz böyrəyini sataraq yoxsulluqdan çıxmağa çalışan qadının həyatı barədədir. Filmin sloqanı belədir: "Bəzilərinin bədbəxtliyi digərlərini xoşbəxt edir və biz buna insanlıq deyirik".