Selfi çubuğu 20 il ara ilə iki dəfə ixtira olunub. Dünyanın fərqli qitələrindəki iki fərqli insan tərəfindən Avropa səyahəti zamanı yaşanan problemlər ucbatından…

Axar.az xarici mediaya istinadən xəbər verir ki, bundan sonra selfi çubuqları bütün dünyada sürətlə yayıldı və eyni sürətlə də müxtəlif ölkələr tərəfindən qadağan olunmağa başladı.

İndi bir çox stadionda, konsert zalında, muzeydə, hətta Əpl şirkətinin konfranslarında selfi çubuqlarına qadağa mövcuddur.

Selfi çubuqları bir zamanlar o qədər əhəmiyyətsiz görünürdü ki, "101 ən lazımsız yapon ixtirası" siyahısında yer almışdı.

İlk selfi çubuğu 1980-ci ildə Hiroşi Ueda tərəfindən ixtira olunub. Ueda o vaxtlar "Minolta" şirkətində işləyirdi və daim öz üzərində işləyən bir fotoqraf idi. Avropaya səfər zamanı onun fotoaparatını oğurlayırlar. Bu hadisədən sonra öz xanımı ilə şəkil çəkdirmək istəyəndə fotoaparatını heç kimə etibar etmir:

"Parisdə Luvr muzeyində idik. Bir uşaqdan fotomuzu çəkməsini istədim. Arxaya çəkilən kimi fotoaparatımı oğurlayıb qaçdı".

Bu problemə bir son qoymaq lazım idi. Bundan sonra Ueda uzatma çubuğu – selfi çubuğunu ixtira etdi. 1983-cü ildən satışa buraxılsa da, kifayət qədər alıcı toplaya bilmədi. Ueda fikrindən dönmədi və 30 il boyunca öz ixtirasını yanında gəzdirdi.

2003-cü ildə Uedanın patent hüquqları sona çatdı. Yəni selfi çubuğunun məşhurluq qazanmasından 10 il öncə. Ueda bu haqda belə deyir: "Mənim ixtiram bir az tez oldu. 300-ə yaxın zamansız ixtiram var, selfi çubuğu da onlardan biri idi".