Yazıçı Kamal Abdulla İtaliyanın "Rai 3" kanalında Dünya Kitab və Müəllif Hüquqları Günü ilə bağlı Milanda hazırlanmış televiziya proqramının qonağı olub.

Axar.az Azərtac-a istinadən xəbər verir ki, İtaliya Naşirlər Assosiasiyasının "İo legge perche" (Mən oxuyuram, çünki...) layihəsi çərçivəsində yayımlanmış proqrama, xüsusilə, ədəbi keyfiyyətinə, oxucular tərəfindən yüksək qiymətləndirilməsinə və böyük tirajla satışına görə seçilən kitabların müəllifləri dəvət edilib. Yazıçı Kamal Abdullanın italyan oxucular tərəfindən maraqla qarşılanan "Yarımçıq əlyazma" romanı da bu nəşrlər arasındadır.

Proqramda Kamal Abdulla kitab oxumağın faydaları ilə bağlı fikirlərini tamaşaçılarla bölüşüb: "Mən oxumağı sevirəm, çünki bilirəm ki, bu zaman xalqlar bir-birini daha gözəl tanıyır, bir-birinin xasiyyətinə, təbiətinə daha yaxşı bələd olur. Tolerantlıq üstünlük qazanır və insanların qəlbinə mərhəmət, şəfqət hissləri dolur. Mən kitabın səhifələrini açdıqca ölkələrin qapalı sərhədləri də mənim gözümdə açılır və söz hakimi-mütləq olur, söz qılınca qalib gəlir".

Qeyd edək ki, "İo legge perche" (Mən oxuyuram, çünki...) layihəsi İtaliyada müxtəlif kitabların təbliği və kitabsevərlərin bir araya gəlməsi üçün irəli sürülən ən önəmli təşəbbüslərdəndir.