Xoşbəxtlik və romantika, dəlilik və rok, mistika və şöhrət, qalmaqal və sensasiyalar – bütün bu sözlər Salvador Dalinin həyatını özündə əks etdirir.

Axar.az XX əsrin ən yaddaqalan, orijinal və özünəməxsus rəssamı Salvador Dali haqda bilmədiyiniz 9 faktı təqdim edir:

Dali 5 yaşı olanda öyrəndi ki...

Salvador Dalinin bütöv adı – Salvador Domenek Felip Jasint Domenek markiz de Puboldur. Dali hələ uşaqlıqdan qəribə idi, lakin onun belə qeyri-adi və özünəməxsus biri kimi yetişməsində valideynlərinin müstəsna rolu olub. 5 yaşı olanda valideynləri Daliyə demişdi ki, o, meningitdən ölən qardaşının reinkarnasiyasıdır.

Konfetə görə dava

Dali zirək, təkəbbürlü uşaq idi. Hətta bir dəfə o, ticarət mərkəzlərindən birində konfet üstündə dava salıb bütün camaatı ətrafına toplamışdı. Onun ətrafına yığılan kütlənin içində olan polis şirniyyat satan kişiyə müraciət edib uşağa konfet verməsini xahiş etmişdi. Yalnız bundan sonra Dali sakitləşmiş və yoluna davam etmişdi. Dali həmişə öz ərköyünlüyü ilə ətrafdakıların diqqətini cəlb etməyə çalışan bir uşaq olub.

10 yaşı olanda

Rəssam ilk rəsm əsərini 10 yaşı olanda işləyib. Məktəb yoldaşları isə Dalini sevmirdi və onu həmişə lağa qoyurdular. Dali isə buna görə əsəbiləşib, dava edirdi. O, orta məktəbdə oxuyanda qumar oynamağa başlayır. Bir müddət sonra dəcəl Dalinin hərəkətlərindən təngə gələn rəhbərlik onu məktəbdən qovur. Salvador heç kimdən qorxmurdu. Onun ən böyük fobiyası çəyirtkələr idi, amma qan görməkdən xoşu gəlirdi. Bəlkə də, Dalinin xislətindəki bu dalaşqanlıq elə qan görmək arzusundan qaynaqlanırdı.

Ən yaxşı tələbə

Dali 17 yaşı olanda San Fernando Akademiyasının tələbəsi adını qazanır. Akademiyada təhsil aldığı vaxtlar o, özünəməxsus xarakteri ilə çoxlarının rəğbətini qazanır, müəllimlər ona xüsusi hörmətlə yanaşır. Bu illərdə o, həm də ən yaxşı tələbə adına layiq görülür və yaratdığı əsərlərə görə çoxsaylı mükafatlar alır.

Dali kompensasiyası

Dali 1929-cu ildə Paris yaxınlığında fransız şair Pol Eluarla görüşür. Görüş zamanı Dali şairin xanımı Yelena Dyankonovaya aşiq olur. Xanım Yelenanın 35, Dalinin isə 25 yaşı olur. Buna baxmayaraq, Dyankonova öz varlı və məşhur ərini atıb kasıb Dalini seçir. Dostunun arvadını əlindən aldığını dərk edən Dali "kompensasiya" olaraq onun portretini çəkir.

Dalğıc kostyumunda

Dali insanları təəccübləndirməyi sevirdi. 1934-cü ildə Nyu Yorka gələndə o, aksesuar olaraq əlində 2 metr uzunluğunda çörək gətirir. Londonda sürrealist əsərlərinin nümayişi zamanı isə sərgiyə dalğıc kostyumunda gəlir.

2045-ci ilin kostyumu

1939-cu ildən məşhurlaşmağa başlayan Dali brend mağazalardan birinin vitrinini bəzəmək sifarişi alır və özünə "Gündüz və gecə" mövzusunu seçir. O, manekenlərin saçlarını cəsədlərdən götürülmüş əsil tüklərdən düzəldir. Vitrində həmçinin öküz başı, vanna, ağzından qan axan göyərçin və başqa predmetlər olur. 1950-ci ildə Dali Kristian Diorla birgə 2045-ci ilin kostyumunu yaradır.

"Çupa Çups" - Dali sürrealizmi

Salvador şirniyyatı çox sevirdi. "Çupa Çups"un loqotipini işlədikdən sonra o, şirkətdən pul almır, əvəzində hər gün ona şirniyyat göndərmələrini istəyir.

"Bütün həyatım teatr idi"

Muzeydə teatr divarlarının arasında Dalinin bədəni saxlanılır. O, teatrı çox sevirdi və öldükdən sonra cəsədinin teatr divarları yaxınlığında nümayiş olunmasını istəyirdi: "Mənim bütün həyatım teatr idi".

Məşhur sürrealistin "məzarını" hər gün minlərlə insan ziyarət edir.