Zimbabve Milli Parkında şiri öldürən stomatoloq Uolter Palmeri heyvansevərlər qınasa da, onun bu hərəkətinə haqq qazandıranlar da olub.

Axar.az xəbər verir ki, Aydaho ştatının sakini Sabrina Korqatelli də bu insanlardan biridir. Bu xanım ekzotik heyvanları öldürmək hobbisi ilə tanınır. Stomatoloqa dəstək olan xanım sosial şəbəkədə ölü zürafə ilə fotosunu paylaşıb və "Zürafəni öldürdüm! Xoşbəxtəm!" – yazıb.

Sabrina tez-tez müxtəlif ekzotik heyvanların cəsədi ilə fotolar paylaşıb, "sevinci"ni dostları ilə bölüşür. Çoxsaylı tənqidlərə məruz qalan gənc xanım bu hərəkətinə bəraət qazandırmaq üçün bu sözləri deyib:

"Ekzotik heyvanları öldürmək hobbisi utanılacaq bir şey deyil. Ovçular heyvanları öldürsələr də, onlara hörmətlə yanaşırlar. Mənim öldürdüyüm zürafə çox yaşlı idi. Həm də zürafələr təhlükəli heyvanlardır, onlar insana ciddi xəsarət yetirə bilərlər".