Gənc yazar, repçi Elxan Qaraqan pirat kitabların satışının qarşısını almaq üçün maraqlı bir yola əl atıb. Qaraqan yaydığı bəyanatda bir çox mağazalarda kitabını pulsuz payladığını bildirib:

"Mən Elxan Zeynallı (Qaraqan) Azərbaycan ərazisində "Ali və Nino" kitab dükanlarından başqa bütün digər satış nöqtələrində satılan "Mələk", "Evakuasiya", "Birinci addım", "İkinci addım" əsərlərini oxuculara pulsuz hədiyyə edirəm".

Bundan sonra repçinin səhifəsində məsələ ilə bağlı açıqlama yayımlanıb. Açıqlamada bəyanat üzərindən növbəti elan verilib:

"Ali və Nino" mağazalar şəbəkəsindən başqa yerdə "Mələk", "Evakuasiya", "Birinci Addım", "İkinci Addım" kitabları sizə Qaraqan tərəfindən pulsuz hədiyyə edilir. Əgər sizi polislə hədələsələr, polis əməkdaşlarına yazıçının rəsmi ərizəsini göstərməyiniz kifayətdir. Yazıçının pulsuz elan etdiyi məhsulu heç kəs sata bilməz. Kitabın bütün müəllif və çap hüquqları yalnız Qaraqana məxsusdur. Orijinal kitaba pulu olmayan oxuculara pirat kitabları pulsuz veririk".