Azərbaycan şairi Mirzə Ələkbər Sabirin 100 illiyi münasibətilə çıxan poçt markasının "eBay" internet mağazasında baha qiymətə satışa çıxarılmasının səbəbi məlum olub.

Axar.az xəbər verir ki, buna səbəb Mirzə Ələkbər Sabirin adına iki poçt markasının buraxılmasıdır.

1962-cı ildə Sabirin adına çıxan poçt markası "Azərbaycanın şairi Sabir" adı altında buraxılıb. Tezliklə ifadənin yanlış olduğu ortaya çıxıb. Satışda olan bütün markalar yığışdırılıb və marka "Azərbaycan şairi Sabir" adı ilə satışa çıxarılıb.

Amma bu hadisə qədim pul, sikkə və markaların kolleksiyasını yığan numizmatiklərin marağından yayınmayıb. Onlar markanın nadir nüsxəsini əldə edib saxlayıblar.

Bu gün həmin "səhv" – bir şəkilçi fərqi - markanın qiymətinin bahalığına səbəb olub. 1962-ci ildə 4 qəpik dəyərində olan marka bu gün 2.777,74 (2 min 777 dollar 74 sent) dollara satılır.

Müqayisə üçün deyək ki, digər Azərbaycan şairləri – Nəsimi, Füzuli, Nizami və s. klassiklərin markalarının qiyməti 5 dollara qədərdir.