Məşhur "Çaqqalın günü" əsərinin müəllifi Frederik Forsayt İngiltərə Kəşfiyyat Orqanı Mİ6-da 20 il çalışdığını açıqlayıb.

Axar.az xarici mətbuata istinadən xəbər verir ki, "Kobra" və "Əfqan" kimi casusluq mövzusunda yazılmış romanları ilə tanınan Forsaytın oxucuları müəllifin özünün də casus olduğunu iddia edib.

Yazıçı uzun illər davam edən iddia və şübhələrə son qoymaq üçün "Mənim həyatım" ("My Life") başlığı ilə yazdığı tərcümeyi-halında məsələyə aydınlıq gətirib.

O, 1967-1970-ci illərdə Nigeriyada vətəndaş müharibəsi başladığı bir vaxtda Mİ6 kəşfiyyat idarəsində işə başladığını açıqlayıb. 1971-ci ildə "Çaqqal" romanı ilə böyük uğurlara imza atan Forsayt kəşfiyyat idarəsində olan nüfuzunu artırdığını və agentlik fəaliyyətini daha da gücləndirdiyini qeyd edib.

Bu günə qədər 70 milyondan çox kitabı satılan Fredirik Forsayt maddiyat qarşılığında deyil, sadəcə ölkəsinə xidmət etmək üçün casusluq etdiyini bildirib.