Mənim sənətkar yetişdirmək borcum yoxdur.

Axar.az xəbər verir ki, bu sözləri xalq artisti Afaq Bəşirqızı tələbələri haqda "V element" verilişində danışarkən deyib. Xalq artisti gənclərə istedadlarına görə qiymət verdiyini bildirib:

"Mənim kimisə sənəkar kimi yetişdirmək borcum yoxdur. Əgər o mənimlə birlikdə səhnəyə çıxırsa, mənim hərəkətlərimi müşahidə edə bilirsə, bu özü elə ona dərs kimi bir şeydir. Mən 5 ildir ki, universitetdə dərs deməkdən imtina etmişəm. Çünki o vaxt çox adama dedim, bütün elmi şuralarda çıxışlar etdim ki, Mədəniyyət və İncəsənət Universitetinə qəbul test imtahanı ilə olmasın. Çünki çox istedadlı bir gənc gəlir, qabiliyyət imtahanından keçir, amma test imtahanından keçə bilmir. Nəticədə də çox istedadlı bir gənc çıxıb gedir, küsür bizdən.

Yerinə gələn, test imtahanını keçəndən soruşursan ki, niyə aktyor olmaq istəyirsən? Deyir ki, mən aktyor olmaq istəmirdim, başqa bir ixtisas istəyirdim, sadəcə, balım bura çatdı. İndi gəl, bu uşaqlara həvəslə dərs keç".