Məşhur sənətçilərin səhnə fəaliyyətləri ilə yanaşı, şəxsi həyatları da həmişə tamaşaçıda böyük maraq doğurub. Onların sənətə gəlişlərindən tutmuş, şəxsi həyatlarına qədər açdıqları sirlər həmişə maraqla qarşılanıb.

Tanınmış sənət adamları bu dəfə ilk sevgi münasibətləri ilə bağlı xatirələrini Axar.az-la bölüşüb.

Göygöz qız

Xalq artisti Ramiz Novruz göygöz qıza sevgisini xatırlayır:

"Mənim ilk sevgi macəram orta məktəbdə başlayıb. Bizi onunla birləşdirən səhnə idi. O, məktəbdə məndən iki sinif aşağı oxuyurdu. Balaca, göygöz bir qız idi. Bir dəfə məktəbdə tədbir təşkil olunmuşdu. Tədbirdə mən də çıxış edirdim, o da. Səhnəyə çıxdı, o vaxt məşhur olan bir mahnını – "Ay gilənar, ay gilənar, bağımızın gül səsisən" mahnısını ifa etdi. Sonra anladım ki, mən həmin mahnını tez-tez eşitmək istəyirəm. Bir də gördüm, ona dəhşətli dərəcədə bağlanmışam. Sonra biz həmin göygöz qızla ailə həyatı qurduq və indi evliyik".

O yaşımda sünnət olundum

Xalq artisti Arif Quliyevin evi olmadığına görə ilk sevgilisi ondan üz döndərib:

"Mingəçevirdə məktəbdə oxuyanda bir dəfə bağda gəzirdim. Bir qız gördüm, adı Sevinc idi. Çox gözəldi. Onun gözəlliyi hələ də yadımdan çıxmır. Biz onunla tanış olub, görüşməyə başladıq. Sonra o məni öz rəfiqəsi Dünel ilə tanış etdi. Mənim ondan da xoşum gəldi. Beləliklə, başladım bunların ikisi ilə də görüşməyə: həftənin 3 günü biri ilə görüşürdüm, 4 günü biri ilə. Günlərimiz belə də keçirdi. Qızların ikisinin də bir-birindən xəbəri olmurdu. Sonra mən əsgər gedəsi oldum. Hərbi xidmətdə olanda qızlar xəbər tutublar ki, bəs, mən internatda böyümüşəm və kiçik toyum olmayıb. Əsgərlikdən qayıdandan sonra Sevinc mənim üzümə dedi ki, sən internatda böyümüsən, evin yoxdur, ona görə də evlənə bilmərik. Dünel də dedi ki, sən internatda böyümüsənsə, demək, sənin kiçik toyun olmayıb, ailəm bizim evlənməyimizə icazə verməz. Bu hadisə mənə o qədər təsir etdi ki, gedib o yaşımda sünnət olundum. Hər dəfə o günü xatırlayanda məni ağlamaq tutur".

Sirr kimi...

Aktrisa Mehriban Xanlarova ilk sevgisini məktəb illərində yaşayıb:

"İlk sevgimi məktəb illərində yaşamışam. O vaxt sinfimizdə bir oğlan var idi, onu sevirdim. Düzdür, ona sevdiyimi heç vaxt demədim. Həmişə sirr kimi içimdə saxladım... Sonradan o hisslər keçib getdi".

İlk və tək sevdiyim

Aktyor Elməddin Cəfərov da ilk sevdiyi qadınla ailə həyatı qurub:

"Mənim bu həyatda ilk və tək sevdiyim qadın həyat yoldaşım olub. Biz onunla universitetdə tanış olmuşuq, düz 4 il eyni qrupda oxuduq. Ali təhsil aldıqdan sonra da evləndik. Şükür Allaha, indi də 2 övladımız var, hər şey əladır".

Macəra dolu Amerika

Müğənni Miri Yusifin ilk sevgisi ona böyük çətinliklər yaşadıb:

"Məktəb illərindən başlayan sevgimin arxasınca Amerikaya getdim. O zaman aeroportda tək qaldım: arxasınca okeanı keçdiyim xanım məni qarşılamadı. Elə bununla da həyatımda ən çətin, lakin maraqlı günlər başladı. Bank hesabımda 1 dollar belə olmadığı halda mən Amerikada yaşamağa başladım. Baxmayaraq ki, həmin vaxtlarda "Dəyirman" çox populyar idi, konsertləri anşlaqla keçirdi. Hətta qabyuyandan ofisianta qədər hər bir işdə çalışdım. Qalmağa yerim olmadığı üçün üfürülən döşəyim ilə işlədiyim yerdə qalırdım. "Karantin" adlandırdığım bu dövrdə yeni ruhda, yeni tərzdə mahnılar yazmağa başladım. Vaxt keçdi və mənim həyatım öz axarına düşməyə başladı. Bakıya gəldiyim bir vaxtda konsertdə bir qızla qarşılaşdım. Ertəsi gün həmin qız ailəvi dostu Fidan Qasımova ilə bizim evə gəldi. Cəmi bir ay sonra həmin xanımla ailə qurduq".