Elə bir mühitdə yaşamışam ki, orada müğənni olmaq çətin idi. Dağlı məhəlləsində böyümüşəm. Orada deyirdilər, qız da artist olar?

Axar.az xəbər verir ki, bu sözləri müğənni Mətanət İsgəndərli "ATV maqazin onlarla" verilişində erkən yaşda ailə həyatı qurması haqda danışarkən deyib. O, sənətə çox çətinliklə gəldiyini bildirib:

"Bircə atam oxumağıma razı idi. Yetkinlik yaşıma çatanda evdə dedilər, ərə getməlisən. Mən həyat yoldaşımın üzünü görmədən ərə getmişəm. Elçi gəliblər, valideynlərim də verib. Sadəcə, bilirdim ki, uzaqdan qohumumdur. Nişanlımı üzük taxılandan 4 ay sonra görmüşəm. Atam görüşməyimizə icazə vermirdi. Həyat yoldaşım mənə sənətdə çox dəstək oldu. Kərim doğulmuşdu. Sonra sənədlərimi texnikuma verdim. Ülkər bətnimdə idi, onu tələf etmək istəyirdim. İki uşaqla təhsil almaq mənə çətin gəlirdi. Amma Ülkəri dünyaya gətirdim".