Ana səhifə Kult Musiqi |
Bu gün, demək olar ki, bəstələdiyi bütün mahnıları dillər əzbəri olan Emin Sabitoğlunun doğum günüdür.
Azərbaycanın görkəmli bəstəkarı Emin Sabitoğlu 1937-ci il noyabrın 2-də Bakıda anadan olub. Musiqi məktəbindən sonra Konservatoriyaya daxil olub (1954, Qara Qarayevin sinfi). İki ildən sonra Çaykovski adına Moskva Dövlət Konservatoriyasına keçirilib (1956-1961, Yuri Şaporinin bəstəkarlıq sinfi).
1961-ci ildə "Azərbaycanfilm" kinostudiyasında musiqi redaktoru vəzifəsində çalışıb. Sonrakı illərdə Dövlət Filarmoniyasında bədii rəhbər, Ü. Hacıbəyov adına Dövlət Konservatoriyasında (indiki Bakı Musiqi Akademiyası) müəllim işləyib. Musiqinin müxtəlif janrlarında bir çox dəyərli əsərlərin müəllifi olan Emin Sabitoğlu bir simfoniya, üç simfonik poema, üç kantata, simli kvartet, skripka və fortepiano üçün poema yazıb. Lakin bir neçə musiqi janrı onun yaradıcılığının əsasını, müəyyənedici hissəsini təşkil edirdi. "Dərələr", "Bakı, sabahın xeyir", "Uzaq yaşıl ada", "Dağlar", "İnsaf da yaxşı şeydir" mahnıları çoxsaylı əsərlərindən bəziləridir. Tamaşalara yazdığı musiqilərsə o qədər çoxdur ki, sayını heç bəstəkarın özü də bilmirdi. Paytaxt teatrları ilə yanaşı Sumqayıt, Gəncə, Lənkəran, Mingəçevir, Naxçıvan teatrlarının tamaşalarına musiqi bəstələyib.
Emin Sabitoğlu nadir bəstəkarlardandır ki, onun mahnılarında melodiya ilə mətn arasında mütləq bir harmoniya var. Vəzifəpərəst, intriqalara meylli insan olmayan sənətkar ömrü boyu təkcə musiqi ilə məşğul olub.
600-dən artıq mahnı, 9 musiqili komediya, 40-a yaxın filmə musiqi bəstələyən sənətkar yaşasaydı, bu gün 78 yaşını qeyd edəcəkdi. E. Sabitoğlu 2000-ci il noyabrın 18-də Bakıda vəfat edib.
Tarix
2015.11.02 / 12:25
|
Müəllif
Nilufər Muğantürk
|