Hazırda bütün toqquşmaların üçdə biri məhz Pokrovsk şəhərində qeydə alınır. Rusiya Donetsk vilayəti istiqamətində 100 min əsgər yerləşdirib.

Axar.az xəbər verir ki, bu sözləri ukraynalı hərbi ekspert Sergey Qrabski bildirib.

Onun sözlərinə görə, bu, çox güclü təzyiqdir və ona görə də hazırda Pokrovsk istiqamətində vəziyyət daim gərgin olaraq qalır.

“Ukrayna hərbçiləri mövqelərini qoruyur və panikaya düşmürlər. Döyüşlər müxtəlif istiqamətlərdə davam edir. Rusiya ordusu ərazidə texnika tətbiq edə bilmir. Ona görə də bunu kiçik piyada qruplarını istifadə etməklə əvəz etməyə çalışır. Bu, əslində “sızma taktikasıdır”. Biz məhz bu sızmalara qarşı mübarizə aparırıq.

Hazırda əməliyyatlar davam edir və qarşı tərəf Pokrovsk istiqamətində sözün əsl mənasında ilişib qalıb. Bu səbəblə həmin istiqamətdən geriçəkilmə imkanı yoxdur.

Novopavlivka və Zaparojye istiqamətlərində isə biz indiyədək məhdud miqyaslı döyüşləri müşahidə edirik.

Qısaca, hazırda Donetsk istiqaməti, xüsusilə də Pokrovskla Konstantinovka arasındakı sahə həm Ukrayna, həm də Rusiya tərəflərinin ən çox qüvvə və resurs sərf etdiyi əsas döyüş zonasına çevrilib”, – ekspert vurğulayıb.