Son dövrlərdə baş verən hadisələr göstərdi ki, Suriyadakı narahatlıq ən çox bizə təsir edir. Suriya torpaqlarında qarışıqlıq yaratmaq istəyənlərə nə biz göz yumarıq, nə də Dəməşq buna razı olar. Biz Suriyanın bütün rəngləri ilə bir və bütöv olmasını və bu şəkildə qalmasını istəyirik.

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan Çin səfərindən qayıdarkən deyib.

“Suriya Prezidenti Əhməd əş-Şara da bizim kimi düşünür. Lakin belə uzunmüddətli bir müharibə yaşamış bütün bölgələrdə olduğu kimi, Suriyada da xaos yaratmaq istəyənlər çoxdur. Onların kim olduqları da bəllidir. Ona görə də biz Suriyanı tək buraxmayacağıq.

Suriyanın yenidən ayağa qalxmasına heç kim mane ola bilməyəcək. Xaosa yatırım edən müharibə baronları bu dəfə uduzacaqlar. Ərəb, kürd, türkman, nusayri, sünni, xristian fərqi olmadan Suriyanın bütün təbəqələri qazanacaq. Açıq şəkildə ifadə etmək istəyirəm ki, bu prosesi pozmağa çalışan hər kəs bunun bədəlini ödəyəcək.

Kürdlər harada yaşamasından asılı olmayaraq bizim qardaşımızdır. Heç kim bizi bir-birimizdən ayıra bilməz. Heç kim bizim əbədi qardaşlığımıza tələ qura bilməz. Qətiyyətliyik, əzmliyik. Necə ki, ət sümükdən ayrılmaz, bizim bu qardaşlığımız da bir-birindən ayrılmaz. Əgər uzaqgörənlik, fərasət və sağlam düşüncə ilə hərəkət edilərsə, hər bir problem həllini tapar. Amma xoş niyyət olmazsa, ən sadə məsələlər belə dolaşıq bir hala gələr. Biz əmin-amanlıq və sakitlik mühitinin möhkəmlənməsinin tərəfdarıyıq və bunun üçün çalışmaqda davam edəcəyik”, - Ərdoğan vurğulayıb.