Qiyam gecəsi komandana zəng edib "Dərhal bu özbaşınalığı dayandırın" dedim. O isə yazılı əmr istədi. Buna çox əsəbiləşdim. "Yazılı əmr yoxdur" dedim. İndi, bildiyim qədərilə, həmin yazılı əmr istəyən general saxlanılıb.

Axar.az xəbər verir ki, bunu Türkiyə Baş naziri Binəli Yıldırım deyib.

"O gecə Daxili İşlər naziri Əfqan Ala və Baş Qərargah ilə əlaqə yaratmaq istədim. Əfqan Ala həmin vaxt təyyarədə imiş. Baş Qərargah rəisinin isə telefonunu əlindən almışdılar. Daha sonra cənab prezidentlə qərarlaşdıq ki, artıq bu mübarizəyə millət də daxil olmalıdır. Xalqı meydanlara səslədik. İnsanlar axın-axın işğalçıların qarşısını almağa başladı. Uniformalı terrorçular insanları gülləbaran etdi. Mən və dostlarım isə Ankara istiqamətində gedərkən böyük maneələrlə rastlaşdıq", - baş nazir bildirib.